អំពីរយើង

វិទ្យាស្ថានតស៊ូមតិ និងគោលនយោបាយ (API) ជាអង្គការក្រៅរដ្ឋាភិបាលមួយរបស់កម្ពុជា ដែលសកម្មក្នុងការតស៊ូមតិ ការជះឥទ្ធិពលនយោបាយ អភិបាលកិច្ចល្អ និងការចូលរួមរបស់ពលរដ្ឋ។ ការកសាងសមត្ថភាព និងការសម្របសម្រួលកិច្ចសន្ទនា គឺជាចំណុចសំខាន់នៃកិច្ចខិតខំប្រឹងប្រែងរបស់យើង ឆ្ពោះទៅរកការអភិវឌ្ឍតាមបែបប្រជាធិបតេយ្យ និងការអភិវឌ្ឍប្រកបដោយនិរន្តរភាព។

យើងទទួលបានការសារទរយ៉ាងទូលំទូលាយ ពីអង្គការក្នុងស្រុក និងអន្តរជាតិសម្រាប់ ភាពដែលអាចជឿជាក់បាន ភាពពាក់ព័ន្ធ និងវិជ្ជាជីវៈរបស់យើង។ ក្នុងរយៈពេលជិតពីរទសវត្សរ៍មកនេះ API បានជួយពង្រឹងជំនាញស្ថាប័នតស៊ូមតិ និងបានខិតខំធ្វើឲ្យលទ្ធិប្រជាធិបតេយ្យមូលដ្ឋាន និងអភិបាលកិច្ចដែលមានគណនេយ្យភាព ក្លាយទៅជាការពិត។ មកទល់នឹងពេលនេះ យើងបានបើកវគ្គបណ្តុះបណ្តាលជាង ៣០០ មកហើយ សម្រាប់អ្នកចូលរួមជាង ១ ម៉ឺននាក់ ដែលមានទំនាក់ទំនងជាមួយសង្គមស៊ីវិល និងអង្គការសហគមន៍ ក្រុមប្រឹក្សាមូលដ្ឋាន ប្រព័ន្ធ​ផ្សព្វផ្សាយ អង្គភាពសហជីព ស្ថាប័នរដ្ឋាភិបាល និងសភាកម្ពុជាផងដែរ។

API មានភាពប្លែកពីគេ នៅក្នុងសង្គមស៊ីវិលរបស់ប្រទេសកម្ពុជា ដោយបម្រើជាអ្នកភ្ជាប់ និងសម្របសម្រួល សម្រាប់ការផ្តល់សិទ្ធិអំណាចដល់ប្រជាជន ក្នុងការធ្វើអន្តរកម្មជាមួយរដ្ឋាភិបាលគ្រប់លំដាប់ថ្នាក់។ API ទទួលបានបទពិសោធន៍ដំបូង លើបញ្ហាគោលនយោបាយ ដូចជាការទទួលបានព័ត៌មាន (A2I) តាមរយៈការងារមូលដ្ឋានរបស់ខ្លួន។ ផ្អែកលើបទពិសោធន៍ដ៏ធំធេងនេះ យើងស្ថិតក្នុងកន្លែងដ៏ល្អបំផុតមួយ ដើម្បីធ្វើឲ្យសំឡេងរបស់ពលរដ្ឋសាមញ្ញ ត្រូវបានរាប់បញ្ចូលក្នុងការធ្វើគោលនយោបាយនៅថ្នាក់ជាតិ។ នៅទីនេះ យើងបានព្យាយាមគាំទ្រដល់ស្ថាប័នរដ្ឋាភិបាល ឲ្យបម្រើប្រជាពលរដ្ឋស្របតាមច្បាប់ និងចូលរួមចំណែកក្នុងបរិយាកាស ដែលអាចឲ្យពលរដ្ឋនិងសង្គមស៊ីវិល អាចបង្ហាញការព្រួយបារម្ភរបស់ពួកគេបាន។ ទីបំផុត យើងបានដើរតួនាទីយ៉ាងសំខាន់ក្នុងការជួយពលរដ្ឋឲ្យយល់ពីសិទ្ធិរបស់ពួកគេ ការទទួលបានព័ត៌មាន និងប្រើប្រាស់ឱកាសសម្រាប់ការចូលរួម ដែលត្រូវបានផ្តល់ជូនដោយច្បាប់ផ្សេងៗ និងគោលនយោបាយរបស់រដ្ឋាភិបាល។

កម្មវិធីរបស់យើងត្រូវបានដឹកនាំដោយ វិធីសាស្រ្តផ្អែកលើសិទ្ធិមនុស្ស។ API បម្រើប្រជាជនកម្ពុជាទាំងអស់ ហើយឲ្យតម្លៃទៅលើភាពខុសគ្នា ដោយមិនប្រកាន់ភេទ និន្នាការភេទ និងអត្តសញ្ញាណ ការមានសតម្ថភាព ការអសមត្ថភាព ជាតិពន្ធុ ជំនឿ និងនិន្នាការនយោបាយឡើយ។ ទន្ទឹមនឹងនេះដែរ យើងមានការប្តេជ្ញាចិត្តជាពិសេស ក្នុងការគាំទ្រដល់អ្នកដែលជួបការលំបាកបំផុត ក្នុងការខិតខំធ្វើឲ្យសំឡេងរបស់ពួកគេ ត្រូវបានគេដឹងឮ។

ប្រជាពលរដ្ឋខ្មែរទាំងអស់មានសិទ្ធិចូលរួមប្រមែប្រមូលនិងសម្តែងចេញនូវរាល់បញ្ហាទាំងឡាយណា ដែលបានប៉ះពាល់ដល់ជីវិតរស់នៅប្រចាំថ្ងៃរបស់ពួកគេ។

រាល់បញ្ហាទាំងអស់គួរតែដោះស្រាយដោយសន្តិវិធីនិងធ្វើឲ្យបានត្រឹមត្រូវទៅតាមគោលការណ៍ទាំងឡាយក្នុងនាមជាមនុស្សជាតិដូចគ្នា។

ការកសាងសមត្ថភាពជាពិសេសនៅថ្នាក់មូលដ្ឋានគឺជាវិធីសាស្ត្រមួយសំខាន់ដែលធ្វើឲ្យមាននិរន្តរភាពបំផុតសម្រាប់ការកសាងអនាគតដ៏ភ្លឺស្វាងរបស់ប្រជាពលរដ្ឋខ្មែរទាំងអស់។

ការផ្សារភ្ជាប់ជាមួយគ្រប់ផ្នែកក្នុងសង្គមទាំងអស់គឺដើម្បីធានាឲ្យបាននូវ ដំណោះស្រាយមួយដែលល្អ
សម្រាប់ជាប្រយោជន៍ដល់សហគមន៍។

តម្លាភាព ឯករាជ្យភាព និងការមិនប្រកាន់បក្សនយោបាយ នឹងជួយស្ថាបនា អង្គការមួយដែលធ្វើឲ្យមានការគោរពនិងជំនឿទុកចិត្តក្នុងចំណោម ប្រជាពលរដ្ឋ ម្ចាស់ជំនួយអន្តរជាតិ និងអ្នកគាំទ្រ។

ប្រទេសកម្ពុជាមានវប្បធម៌ជាតិនៃភាពសុខដុមរមនា ជាមួយស្ថិរភាពនយោបាយ និងសេដ្ឋកិច្ច ការអភិវឌ្ឍប្រកបដោយចីរភាព អភិបាលកិច្ចតាមបែបប្រជាធិបតេយ្យ និងការការពារសិទ្ធិមនុស្សដើម្បីអនាគតដ៏រុងរឿងសម្រាប់ទាំងអស់គ្នា។

ដើម្បីបម្រើតម្រូវការអភិវឌ្ឍន៍សង្គម និងលទ្ធិប្រជាធិបតេយ្យរយៈពេលវែងរបស់ប្រទេសកម្ពុជាតាមរយៈការពង្រឹងសិទ្ធិអំណាចប្រជាពលរដ្ឋក្នុងការប្រាស្រ័យទាក់ទងជាមួយរដ្ឋាភិបាលដើម្បីការពារសិទ្ធិរបស់ពួកគេ។

នៅត្រឹមឆ្នាំ ២០២៨ ប្រទេសកម្ពុជានឹងកាន់តែមានភាពសុខដុមរមនា មានបរិយាបន្ន និងការអភិវឌ្ឍប្រកបដោយចីរភាព អភិបាលកិច្ចល្អ និងការគោរពគោលការណ៍ប្រជាធិបតេយ្យ និងសិទ្ធិមនុស្ស។