ការទទួលបានព័ត៌មាន

“ព័ត៌មានគឺជាអំណាចដ៏ខ្លាំងក្លានៃលទ្ធិប្រជាធិបតេយ្យ ដែលផ្តល់ឲ្យយើងនូវឱកាស ដើម្បីធ្វើការផ្លាស់ប្តូរ និង​ជួយសម្រាលភាពក្រីក្រ” ជាប្រសាសន៍របស់ អតីតអគ្គលេខាធិការអង្គការសហប្រជាជាតិ លោក កូហ្វី​ អាណាន់។ កម្ពុជាក្នុងពេលបច្ចុប្បន្ន មិនទាន់មានច្បាប់ក្នុងការទទួលបានព័ត៌មាននៅឡើយទេ។ ប៉ុន្តែ យុទ្ធនាការរបស់អង្គការសង្គមស៊ីវិលដើម្បីច្បាប់មួយនេះ បាននាំមកនូវលទ្ធផលគួរឲ្យកត់សម្គាល់ខ្លះហើយ។ សេចក្តីព្រាងនៃគម្រោងត្រូវបានពន្យល់យ៉ាងល្អិតល្អន់នៅឆ្នាំ ២០១៨ នៅចុងបញ្ចប់នៃដំណើរការចូលរួមដែល​បើកចំហ កំឡុងពេលដែល អង្គការអាចសម្ដែងនូវក្តីកង្វល់ និងអាចបញ្ចេញមតិរបស់ខ្លួនបាន។ សេចក្តីព្រាងច្បាប់នេះ បច្ចុប្បន្នគឺនៅក្នុងការរង់ចាំ និងតម្រូវឲ្យមានការកែប្រែបន្តទៀត ប្រសិនបើរដ្ឋសភាចង់អនុម័តច្បាប់នេះ ឲ្យត្រូវតាមស្តង់ដាអន្តរជាតិនោះ។

ក្នុងនាមជាអ្នកដែលបង់ពន្ធ និងអ្នកបោះឆ្នោត ប្រជាពលរដ្ឋកម្ពុជាមានសិទ្ធិក្នុងការទទួលបានព័ត៌មានជាសារធារណៈ៖ សិទ្ធិនេះគឺត្រូវបានចែងក្នុងរដ្ឋធម្មនុញ្ញ និងត្រូវបានធានាដោយសន្ធិសញ្ញាអន្តរជាតិ។ ដូច្នេះហើយ ទើប API បានធ្វើការតស៊ូមតិ ដើម្បីច្បាប់ក្នុងការទទួលបានព័ត៌មាន ចាប់តាំងពីអង្គការត្រូវបានបង្កើតឡើងនៅឆ្នាំ ២០០៣ មកម៉្លេះ។ មានតែច្បាប់មួយនេះទេ ដែលអាចធ្វើឲ្យសិទ្ធិអរូបិយនៃរដ្ឋធម្មនុញ្ញ អាចក្លាយជាផ្នែកមួយនៃការពិត ក្នុងជីវភាពប្រចាំថ្ងៃបាន។ នៅមានការងារជាច្រើនទៀតដែលយើងត្រូវធ្វើ ហើយយើងបានប្ដេជ្ញា ក្នុងការបន្តការខិតខំប្រឹងប្រែងបញ្ចុះបញ្ចូលរបស់យើង ដែលនេះជាកិច្ចការមួយ ក្នុងចំណោមកិច្ចការដែលយើងឲ្យអាទិភាពមុនគេ។ ក្រៅពីនេះ យើងបានកត់សម្គាល់ថា យុទ្ធនាការរបស់យើងបានលើកទឹកចិត្តដោយឯកឯង នូវវប្បធម៌មួយនៃការទទួលបានការចូលទៅកាន់ស្ថាប័នសាធារណៈ ព័ត៌មានសាធារណៈ ដ៏ល្អប្រសើរ និងការចូលរួមក្នុងលទ្ធិប្រជាធិបតេយ្យបន្ថែមទៀត នៅក្នុងដំណើរការនីតិបញ្ញត្តិ។

ដោយសារហេតុផលទាំងនេះហើយ យើងជាអង្គការសង្គមស៊ីវិល សូមធ្វើការលើកទឹកចិត្តដល់រដ្ឋាភិបាល និងរដ្ឋសភា ក្នុងការរក្សាការខិតខំប្រឹងប្រែងរបស់ពួកគេ នូវការធ្វើឲ្យល្អប្រសើរឡើងនូវសេចក្តីព្រាងច្បាប់ និងអនុម័តវានៅទីបំផុត។ នៅ API ពួកយើងទន្ទឹងចាំការចូលរួមយ៉ាងសកម្មក្នុងដំណើរការនេះជាមួយគ្នា ទាំងស្ថាប័នរដ្ឋនានា ក្រុមការងាររបស់យើង​ពីវិស័យអង្គការ និងអ្នកដែលពាក់ព័ន្ធដទៃទៀត។ យើងក៏ទទូចអង្គការអន្តរជាតិ ម្ចាស់ជំនួយ ស្ថានទូត និងរដ្ឋាភិបាលបរទេស ដើម្បីបន្តចូលរួមពួតដៃ និងគាំទ្រដំណើរការនេះផងដែរ ទាំងផ្នែកបច្ចេកទេស និងផ្នែកហិរញ្ញវត្ថុ។

ជាង ១៥ ឆ្នាំ កន្លងមក ជាមួយនឹងការផ្សារភ្ជាប់ជាមួយដៃគូជាតិ និងអន្តរជាតិ API បានបង្កើត ការវិភាគ របាយការណ៍ពីតួនាទី និងការសិក្សាក្នុងការវាយតម្លៃ ទៅលើកំណែ នៃសេចក្តីព្រាងមួយចំនួន​។ ពួកយើងក៏បានរៀបចំការប្រជុំពីការប្រឹក្សាជាតិ និងសន្និសិទ្ធអន្តរជាតិ លើសិទ្ធិក្នុងការទួលបានព័ត៌មានជាច្រើនផងដែរ។ អ្នកអាចអានបន្ថែមពីប្រវត្តិនៃដំណើរការនេះ ក៏ដូចជាសារៈសំខាន់នៃការទទួលបានព័ត៌មាន នៅក្នុងជីវិតប្រចាំថ្ងៃនៃប្រជាជនកម្ពុជា ដែលជារឿងមួយក្នុងចំណោមរឿងដែលមានឥទ្ធិពលរបស់យើងផងដែរ។

នៅក្នុងពេលជាមួយគ្នានេះ API បានធ្វើការលើការអនុវត្តនៃការផ្តល់អំណាចឲ្យប្រជាពលរដ្ឋ លើសិទ្ធិរបស់ពួកគេដើម្បីទទួលបានព័ត៌មាន និងការអភិវឌ្ឍសមត្ថភាពរបស់រដ្ឋាភិបាល លើការបង្ហាញចេញព័ត៌មាន ដែលផ្តោតទៅលើថ្នាក់ក្រោមជាតិ។ ការណ៍នេះ ដោយសារតែយើងឃើញថា សិទ្ធិនៃការទទួលបានព័ត៌មាន គឺជាមូលដ្ឋាន ក្នុងការចូលរួមដែលមានប្រសិទ្ធភាព និងគណនេយ្យភាពនៅក្នុងអភិបាលកិច្ចថ្នាក់ក្រោមជាតិ ក្នុងការរួមចំណែកកាត់បន្ថយភាពក្រីក្រ និងសមភាពក្នុងចំណោមក្រុមមនុស្សក្នុងសង្គមទាំងអស់។ ជាឧទាហរណ៍ ការងារនេះ បានធ្វើឲ្យមានភាពងាយស្រួលសម្រាប់ប្រជាពលរដ្ឋ ដើម្បីទទួលបានឯកសារមូលដ្ឋាន និងបានកាត់បន្ថយអំពើពុករលួយ ដោយការធ្វើឲ្យមានតម្លាភាពក្នុងរចនាសម្ព័ន្ធនៃតម្លៃ។ ការបើកបង្ហាញនៃថវិកាថ្នាក់ក្រោមជាតិ បានជួយសហគមន៍ឲ្យយល់ដឹង និងជះឥទ្ធិពលលើអាទិភាព នៃការអភិវឌ្ឍក្នុងមូលដ្ឋាន។

យោងទៅលើផែនការយុទ្ធសាស្រ្តរបស់យើងបច្ចុប្បន្ន យើងនឹងបន្តដើរលើផ្លូវនៃភាពជោគជ័យនេះ ហើយយើងក៏នឹងដឹកនាំយុទ្ធនាការ ដើម្បីការបើកបង្ហាញព័ត៌មានអំពីបញ្ហាសំខាន់ៗផ្សេងទៀតដែរ ដូចជា ថវិកាសាធារណៈ ការគ្រប់គ្រងធនធានធម្មជាតិ កិច្ចសន្យារវាងវិស័យសាធារណៈ និងឯកជន និងការវិនិយោគលើវិស័យឯកជន ដោយការកសាងឡើងក្រោមបទពិសោធន៍ ក្នុងការតស៊ូមតិរបស់ពួកយើង និងការផ្សព្វផ្សាយការអនុវត្តច្បាប់ ដែលមានស្រាប់ ដែលបង្កើតទម្រង់មួយចំនួន ក្នុងការទទួលបានព័ត៌មានក្នុងវិស័យនីមួយៗ។