គម្រោងនេះ (២០២២–២០២៣) បានទទួលមូលនិធិដោយ DanChurchAid (DCA) ហើយមានគោលបំណងចូលរួមក្នុងការប្រយុទ្ធប្រឆាំងនឹងភាពក្រីក្របំផុតក្នុងសហគមន៍ជនបទ។ ជាពិសេស សកម្មភាពដែលបានអនុវត្តមានការគាំទ្រដល់អង្គការសហគមន៍មូលដ្ឋានចំនួន១០សហគមន៍ ដែលមាន ៥ នៅខេត្តពោធិ៍សាត់ (សហគមន៍ ចំនួន ៣ នៅស្រុកភ្នំក្រវាញ និងសហគមន៍ ចំនួន ២ នៅក្រុងពោធិ៍សាត់) និង ៥ នៅខេត្តបន្ទាយមានជ័យ (សហគមន៍ ចំនួន ៣ នៅស្រុកមង្គលបូរី និង សហគមន៍ ចំនួន ២ នៅក្រុងសិរីសោភ័ណ)។ ការងារនេះមានគោលបំណងពង្រឹងស្ថានភាពសហគមន៍ឱ្យអាចប្រើប្រាស់សិទ្ធិ និងអំណាចដោយខ្លួនឯងក្នុងការពិភាក្សាជាមួយអាជ្ញាធរមូលដ្ឋាន និងថ្នាក់ជាតិ អំពីបញ្ហាដែលពួកគាត់ប្រឈមមុខ។ គោលបំណងនេះ ត្រូវបានអន្តរាគមន៍តាមរយៈការអនុវត្តសកម្មភាពក្នុងគម្រោងដូចជា ការបណ្តុះបណ្តាលដល់ថ្នាក់ដឹកនាំ និងសមាជិកសហគមន៍ ចូលរួមការពិគ្រោះយោបល់ និងលើកតម្រូវការក្នុងការប្រជុំនានារបស់អាជ្ញាធរ និងការជួយឲ្យប្រជាជនដឹងពីអត្ថប្រយោជន៍នៃការប្រើប្រាស់កម្មវិធី Pidor Facebook Chatbot សម្រាប់ទទួលព័ត៌មានពីសេវាច្រកចេញចូលតែមួយ តាមដានការផ្តល់សេវា និងផ្តល់មតិត្រឡប់ របស់អ្នកផ្តល់សេវា។ ចុចទីនេះដើម្បីទាញយករបាយការណ៍ចុងក្រោយ៖ សម្លេង និងសកម្មភាពរបស់ពលរដ្ឋសម្រាប់ការអភិវឌ្ឍន៍ប្រកបដោយនិរន្តរភាពនៅកម្ពុជា (ឆ្នាំ២០២២)។
1) API បានគាំទ្រសហគមន៍អភិរក្ស និងនេសាទបឹងកំពែង (មានមូលដ្ឋាននៅភូមិកំពែង ឃុំព្រងិល ស្រុកភ្នំក្រវាញ) ដែលមានសមាជិកចំនួន ៩៤៥ នាក់ (ស្រី ៤៤៥ នាក់) ។ សហគមន៍អាចលើកឡើងជាមួយអាជ្ញាធរអំពីបញ្ហាមួយចំនួនទាក់ទងនឹងបទល្មើសនេសាទ ការបំពុលទឹកបឹង និងការផ្តល់មូលនិធិល្បាតសហគមន៍។ សហគមន៍នេះគ្របដណ្តប់លើផ្ទៃដី ២ ហិកតា។
2) API បានគាំទ្រសហគមន៍ព្រៃឈើគល់ទទឹងក្នុង ៥ភូមិ (ឃុំសន្ទ្រែ ស្រុកភ្នំក្រវាញ) ដែលមានសមាជិក ១,៣៩២ នាក់ (ស្រី ៦៩៥ នាក់) ។ បញ្ហាមានរាប់ចាប់ពីការកាប់បំផ្លាញព្រៃសហគមន៍ ការទន្ទ្រានយកដីឯកជន និងដីសហគមន៍។ ដីសហគមន៍មានផ្ទៃដី ៣២៨ ហិកតា។
៣) API បានគាំទ្រសហគមន៍ព្រៃឈើសំរោង ភូមិតាដេស (ឃុំសំរោង ស្រុកភ្នំក្រវាញ) ដែលមានសមាជិក ៣៣៥ នាក់ (ស្រី ១៦៨ នាក់)។ បញ្ហារបស់ពួកគាត់គឺការកាប់បំផ្លាញព្រៃសហគមន៍ដោយអ្នកកាប់ឈើនៅខាងក្រៅតាំងពីឆ្នាំ ២០១៨ រហូតដល់បច្ចុប្បន្ន។។ ដីសហគមន៍ចំនួន ២០ ហិកតាត្រូវបានបាត់បង់ក្នុងចំណោមផ្ទៃដីសរុប ១៧០០ ហិកតា។
៤) API បានគាំទ្រសហគមន៍ព្រៃឈើអូរថ្កូវស្ថិតនៅក្នុងភូមិអូរថ្កូវ (សង្កាត់រលាប ក្រុងពោធិ៍សាត់) ដែលមានសមាជិកចំនួន ២,៧៣៥នាក់ (ស្រី ១,៣៤៣នាក់)។ បញ្ហាខ្វះខាតថវិកាក្នុងការចុះល្បាតព្រៃសហគមន៍ចំនួន ៣៩៥ ហិកតា និងឈ្មួញកាប់ឈើប្រមាណ ៣០ ដើមក្នុងមួយថ្ងៃក្នុងព្រៃសហគមន៍ចាប់តាំងពីឆ្នាំ ២០២១។ សហគមន៍បានតស៊ូមតិឲ្យអាជ្ញាធរ និងរដ្ឋបាលព្រៃឈើបង្ក្រាបការកាប់ឈើខុសច្បាប់ និងស្វែងរកការគាំទ្រផ្នែកច្បាប់ដើម្បីចុះបញ្ជីជាតំបន់ទេសចរណ៍ធម្មជាតិ។
៥) API បានគាំទ្រដល់សហគមន៍កសិកម្មអភិវឌ្ឍន៍ដប់បាត ភូមិដប់បាត (សង្កាត់លលក ស ក្រុងពោធិ៍សាត់) ដែលមានសមាជិក ៦៦នាក់ (ស្រី ៤៣នាក់)។ បញ្ហារបស់ពួកគាត់គឺកង្វះចំណេះដឹងបច្ចេកទេសលើការលាយជីជាមួយដីបន្លែ ដែលធ្វើឲ្យទិន្នផលទាប និងខ្វះបច្ចេកទេសចិញ្ចឹមមាន់ និងត្រី។
៦) API បានគាំទ្រសហគមន៍ “អ្នកផ្ទុកមេរោគអេដស៍ រួមគ្នាកសាងជីវិតថ្មី” នៅភូមិសឿ (ឃុំសឿ ស្រុកមង្គលបូរី) ដែលមានសមាជិក ៦១២ នាក់ ៣៧៤នាក់ (ស្រី)។ បញ្ហាចម្បងរបស់ពួកគាត់ គឺ អាកប្បកិរិយាគ្មានសីលធម៌របស់មន្ត្រីទទួលបន្ទុកចែកចាយថ្នាំប្រឆាំងមេរោគអេដស៍ដល់អ្នកជំងឺ និងកង្វះថវិកាសម្រាប់ការព្យាបាលនៅមន្ទីរពេទ្យរដ្ឋ និងឯកជន ដូច្នេះសហគមន៍ត្រូវតែតស៊ូមតិដើម្បីទទួលបានមូលនិធិសង្គមសម្រាប់ការព្យាបាលដោយឥតគិតថ្លៃ។
៧) API គាំទ្រសហគមន៍នេសាទសំបូរ ស្ថិតក្នុងភូមិសំបួរ ឃុំសំបួរ ស្រុកមង្គលបូរី ដែលមានសមាជិក ៦៣៩នាក់ (ស្រី ៣៧២នាក់)។ បញ្ហារបស់ពួកគាត់ គឺជនល្មើសដែលបន្តទន្រ្ទានយកបឹងសាធារណៈដើម្បីពង្រីកអាជីវកម្មឯកជន។ ដីសរុប ៣.១៩៥ហិកតា៖ រំលោភយក ៥ហិកតា។
៨) API បានគាំទ្រដល់ការអភិវឌ្ឍន៍សហគមន៍យុវជនរួបរួមភូមិស្រះរាំង (ឃុំស្រះរាំង ស្រុកមង្គលបូរី) ដែលមានសមាជិកចំនួន ២០ នាក់ (ស្រី ១២ នាក់)។ បញ្ហាចម្បងគឺរដ្ឋបាលឃុំមិនបានបញ្ចេញព័ត៌មានថវិកា (ថវិកាឃុំ) ជូនប្រជាពលរដ្ឋ។
៩) API បានគាំទ្រសហគមន៍នេសាទភូមិភ្នៀត-កោះពង់សត្វ ភូមិអ្នកតា (សង្កាត់ភ្នៀត ក្រុងសិរីសោភ័ណ្ឌ) ដែលមានសមាជិកចំនួន ៩៩២នាក់ (ស្រី ៦៦៣នាក់)។ បញ្ហារបស់ពួកគាត់ទាក់ទងនឹងការនេសាទក្នុងសហគមន៍ និងការខ្វះទឹកនៅរដូវប្រាំង។ ប្រជាពលរដ្ឋមួយចំនួនបានប្រើប្រាស់ទុនបម្រុងទឹកសាធារណៈសម្រាប់ស្រោចស្រពស្រែរបស់ពួកគាត់ និងកាប់បំផ្លាញព្រៃឈើក្នុងតំបន់ ដើម្បីពង្រីកទ្រព្យសម្បត្តិរបស់ខ្លួន។ សហគមន៍បានស្នើសុំការគាំទ្រសម្រាប់ការដើរល្បាតដូចជា ពិល អង្រឹង និង អាយកូម (I-Com)។
10) API បានគាំទ្រសហគមន៍ អភិរក្សពូជត្រី ចំរុះព្រហូត ស្ថិតក្នុងភូមិព្រហូត (សង្កាត់អូរអំបិល ក្រុងសិរីសោភ័ណ) ដែលមានសមាជិកចំនួន ១៥០ នាក់ (ស្រី ៦៥ នាក់) ។ បញ្ហារបស់ពួកគាត់ គឺបុគ្គលដែលបន្តប្រើប្រាស់សំណាញ់ ឆក់ និងឧបករណ៍នេសាទប្រភេទផ្សេងទៀត ដើម្បីចាប់ត្រីទាំងធំ និងតូចសម្រាប់ធ្វើអាជីវកម្ម។ សហគមន៍បានស្នើសុំឧបករណ៍សម្រាប់យាមដូចជា ចង្កៀងសូឡា អំពូលភ្លើង អង្រឹង និង អាយកូម (I-Com) ។
បញ្ហាទាំងអស់ខាងលើ ត្រូវបានពិភាក្សាដោយតំណាងសហគមន៍ជាមួយអ្នកធ្វើសេចក្តីសម្រេច តាមរយៈការសម្របសម្រួលពីAPI ក្នុងកិច្ចប្រជុំក្រុមប្រឹក្សាឃុំ/សង្កាត់ប្រចាំខែ វេទិកាសាធារណៈ កិច្ចប្រជុំពិភាក្សាជាមួយអភិបាលក្រុង ស្រុក អំពីថវិកា លទ្ធកម្ម និងការគ្រប់គ្រងហិរញ្ញវត្ថុ និងតាមរយៈការពិភាក្សាគោលនយោបាយដែលរៀបចំដោយ API នៅថ្នាក់ជាតិជាមួយក្រសួងសំខាន់ៗ និងអ្នកពាក់ព័ន្ធរបស់រដ្ឋាភិបាល។ សហគមន៍បានលើកឡើងពីបញ្ហា ឬកង្វល់ដល់អាជ្ញាធរ ហើយបានស្នើសុំការឆ្លើយតបរបស់ពួកគាត់។ ១00% នៃបញ្ហាសំខាន់ៗត្រូវបានដោះស្រាយ (សម្រាប់ ១0 សហគមន៍)ក្នុងនោះបញ្ហាចំនួន ២ ត្រូវបានដោះស្រាយចប់ទាំងស្រុង ហើយបញ្ហាចំនួន ៨ទៀត ត្រូវបានដោះស្រាយនិង ទទួលលទ្ធផលបានមួយចំនួន និងកំពុងបន្តការដោះស្រាយ។
ក្រុមយុវជនរួបរួមដើម្បីអភិវឌ្ឍន៍សហគមន៍ (YUCD) គឺជាសហគមន៍មួយដែលមានមូលដ្ឋាននៅក្នុងស្រុកមង្គលបូរី (ខេត្តបន្ទាយមានជ័យ) ដែលមានចក្ខុវិស័យដើម្បីឱ្យមានការចូលរួមរបស់យុវជនកាន់តែច្រើនក្នុងការអភិវឌ្ឍន៍សហគមន៍។ YUCD ដឹកនាំដោយកញ្ញា ថុល ឡុងឌី និងមានសមាជិកចំនួន២០នាក់ (ស្រី១២នាក់)។ ការបង្កើតក្រុមនេះបានចាប់ផ្តើមនៅក្នុងខែឧសភា ឆ្នាំ២០២៣ លើគំនិតផ្តួចផ្តើមរបស់យុវជនដែលធ្លាប់មិនខ្វល់ពីកិច្ចការសាធារណៈណាមួយ និងមិនដែលចូលរួមក្នុងសកម្មភាពក្រុមប្រឹក្សាឃុំ (CC) ណាមួយនាពេលកន្លងមក។ ទោះជាយ៉ាងណាក៏ដោយ បន្ទាប់ពីរស់នៅក្នុងកន្លែងដែលមានពាក្យចចាមអារ៉ាមជាច្រើន អំពីអំពើពុករលួយនៅសហគមន៍របស់ពួកគាត់។ យុវជនទាំងនេះបានសម្រេចចិត្តធ្វើអ្វីមួយរួមគ្នា។ ពេលនោះ API កំពុងបើកវគ្គបណ្ដុះបណ្ដាលនៅតំបន់នោះអំពីពីដោរអ្នកភូមិឆ្លាមវៃ(Pidor Facebook Chatbot) ។ យុវជនដែលបានចូលរួមក្នុងវគ្គបណ្តុះបណ្តាល និងមើលឃើញពីសក្ដានុពលរបស់យុវជន។ API បានសម្រេចចិត្តសហការជាមួយពួកគាត់ និងជួយរៀបចំ YUCD ជាផ្លូវការ។
អ្នកចូលរួមសិក្ខាសាលាមួយដែលរៀបចំដោយ API សម្រាប់សហគមន៍តាខ្មៅ
បេសកកម្មរបស់សហគមន៍ គឺដើម្បីលើកទឹកចិត្តយុវជនឱ្យកាន់តែច្រើនចូលរួមក្នុងកិច្ចការឃុំ ផ្តួចផ្តើមសកម្មភាពផ្សេងៗដើម្បីជួយសហគមន៍ និងលើកកម្ពស់ការយល់ដឹងអំពីការវិនិយោគ និងថវិកាអភិវឌ្ឍន៍របស់ឃុំ។ សកម្មភាពដំបូងដែលធ្វើដោយក្រុម គឺការផ្សព្វផ្សាយវគ្គបណ្តុះបណ្តាលអំពីពិដោរអ្នកភូមិឆ្លាតវៃ។ វគ្គបណ្តុះបណ្តាលនេះតម្រូវឱ្យ YUCD ជ្រើសរើសយុវជនបន្ថែមទៀត ហើយឱ្យពួកគាត់សិក្សាអំពីសេវាសាធារណៈដែលមាននៅក្នុងការិយាល័យច្រកចេញចូលតែមួយ និងរបៀបស្នើសុំសេវា។ ក្រោយមកក្រុម YUCD មានគំនិតផ្តួចផ្តើមធ្វើសកម្មភាពរៃអង្គាសប្រាក់ជួយប្រជាពលរដ្ឋក្រីក្រក្នុងក្រុងប៉ោយប៉ែត។ កិច្ចការនេះអាចជួយយុវជនឱ្យគិតថាតើពួកគាត់គួរសុំអំណោយពីអ្នកណា រួមទាំងអង្ករ មី និងផលិតផលគ្រឿងទេសផ្សេងៗទៀត។ កិច្ចការនេះត្រូវបានសម្រេចដោយជោគជ័យ និងជំរុញយុវជនទាំងនោះឱ្យចង់ធ្វើបន្ថែមទៀត។
ក្រុមយុវជនរួបរួមដើម្បីអភិវឌ្ឍន៍សហគមន៍ ត្រូវបានបណ្តុះបណ្តាលដោយវិទ្យាស្ថានតស៊ូមតិ និងគោលនយោបាយ (API) អំពីការតស៊ូមតិ ការធ្វើការ និងទំនាក់ទំនងជាមួយអជ្ញាធរ របៀបសរសេររបាយការណ៍ របៀបប្រើជំនាញសម្របសម្រួល និងរបៀបរៀបចំផែនការ និងថវិការបស់ពួកគាត់។ ពួកគាត់ក៏ត្រូវបានបណ្តុះបណ្តាលអំពីរបៀបប្រើប្រាស់បច្ចេកវិទ្យាមួយចំនួន និងរបៀបថតរូបដ៏ល្អ និងបង្កើតវីដេអូដែលទាក់ទាញផងដែរ។ សមាជិក YUCD បានចូលរួមក្នុងការប្រជុំឃុំ ឬស្រុករបស់ពួកគាត់ ដោយមានការជួយបច្ចេកទេសបន្ថែមពី អង្គការAPI សមាជិកនីមួយៗនៃ YUCD បានរៀនទំនាក់ទំនងជាមួយអជ្ញាធរក្នុងពេលកិច្ចប្រជុំ។
ទោះបីជាសហគមន៍ស្ថិតនៅក្នុងដំណាក់កាលដំបូងនៃដំណើរការ ឃើញមានការកែប្រែមួយចំនួនក្នុងចំណោមសមាជិកនៃសហគមន៍ដូចជា យុវជនYUCD អាចបង្កើនសមត្ថភាពជំនាញទន់របស់ពួកគាត់ ឥឡូវនេះ ពួកគាត់ដឹងពីរបៀបរៀបចំរចនាសម្ព័ន្ធ ដំណើរការការតស៊ូមតិ របៀបពិភាក្សាបញ្ហា របៀបទំនាក់ទំនងជាមួយអាជ្ញាធរមូលដ្ឋាន និងរបៀបធ្វើបទបង្ហាញដ៏ស៊ីជម្រៅ។ ពួកគាត់មួយចំនួនបានឆ្លៀតយកឱកាសដែលផ្តល់ដោយ API ដើម្បីប្រកួតប្រជែងខ្លួនឯងឱ្យមានភាពក្លាហាន និងនិយាយជាសាធារណៈ។ យុវជនម្នាក់បានប្រាប់ថា “API បានអញ្ជើញខ្ញុំឱ្យចូលរួមក្នុងវេទិកាមួយក្នុងទីក្រុងភ្នំពេញ វាជាឱកាសដ៏ល្អមួយ។ ខ្ញុំបានប្រាប់ខ្លួនឯងឱ្យសួរសំណួរយ៉ាងហោចណាស់មួយនៅក្នុងវេទិកា ទោះបីខ្ញុំពិតជាញ័រក៏ដោយ។ ខ្ញុំអាចធ្វើវាបាន! “
សកម្មភាពបែបនេះមិនត្រឹមតែបង្កើនទំនុកចិត្តដល់យុវជនប៉ុណ្ណោះទេ ថែមទាំងឱ្យអាជ្ញាធរមូលដ្ឋានជឿជាក់លើសមត្ថភាពយុវជន និងទទួលស្គាល់សមត្ថភាពឆ្នើមរបស់ពួកគាត់។
គម្រោងនេះក៏បានជួយសមាជិកឱ្យយល់អំពីសិទ្ធិរបស់ពួកគាត់ និងមានភាពក្លាហានគ្រប់គ្រាន់ ដើម្បី ចូលរួមជាមួយក្រុមប្រឹក្សាឃុំ និងស្នើឲ្យចែករំលែកព័ត៌មានថវិការបស់ឃុំជាសាធារណៈ។ បច្ចុប្បន្ន YUCD កំពុងធ្វើការលើការបញ្ចុះបញ្ចូល ក្រុមប្រឹក្សាឃុំ ដើម្បីចែករំលែកថវិកាចំណូល និងការចំណាយប្រចាំឆ្នាំប្រកបដោយតម្លាភាពជាមួយសាធារណជន។ សមាជិកយុវជនម្នាក់បាននិយាយថា “ឥឡូវយើងសួរថា ក្រុមប្រឹក្សាឃុំ បានចំណាយអស់ប៉ុន្មានក្នុងមួយឆ្នាំ ដោយឲ្យបិទថវិកាឃុំមួយសន្លឹក នៅមុខរដ្ឋបាលឃុំ ឃុំបានឆ្លើយតបយល់ព្រមធ្វើ ប៉ុន្តែរហូតមកដល់ពេលនេះ ខ្ញុំមិនទាន់ឃើញទេ ឃុំថាក្រដាសនោះត្រូវបានអ្នកផ្សេងបំផ្លាញ។ យើងមិនបានប្រកែកភ្លាមៗទេ ព្រោះយើងយល់ថាអភិបាលស្រុកមង្គលបូរីមិនសប្បាយចិត្តនឹងសំណើរបស់យើង។ យើងមិនបានផ្តល់យោបល់បន្ថែមទៀតទេ ដើម្បីបង្ហាញថា ស្រុកមានតម្លាភាពថវិកា នៅទីបំផុតពួកគាត់សម្រេចចិត្តបិទថវិកានោះ ហើយការពារវាជាមួយនឹងជញ្ជាំងកញ្ចក់ដើម្បីការពារការខូចខាតណាមួយ។ យើងកំពុងរង់ចាំមើលវា“។
ក្រៅពីនោះ ការអនុវត្តសកម្មភាពពិដោរអ្នកភូមិឆ្លាតវៃ ត្រូវបានគេមើលឃើញថា ទទួលបានជោគជ័យខ្លាំងក្នុងសហគមន៍។ វាជួយ YUCD ឱ្យយល់ពីសេវាកម្មដែលមាននៅក្នុងការិយាល័យច្រកចេញចូលតែមួយ និងថ្លៃសេវាជាក់ស្តែង។ YUCD បន្តផ្សព្វផ្សាយព័ត៌មាន និងលើកទឹកចិត្តប្រជាពលរដ្ឋក្នុងតំបន់ ឱ្យប្រើប្រាស់ Pidor ។ មនុស្សភាគច្រើនមិនដឹងអំពីសេវាកម្មទាំងនោះពីមុនមកទេ ប៉ុន្តែ Pidor អាចជួយពួកគាត់បានច្រើន។ ពួកគាត់ក៏អាចយល់ដឹងអំពីឯកសារបន្ថែមដែលត្រូវយកមកជាមួយនៅពេលពួកគាត់ស្នើសុំសេវាកម្ម។ វាមានប្រយោជន៍ និងងាយស្រួល។
