ទីប្រឹក្សា

ការតស៊ូមតិនៅប្រទេសកម្ពុជាបានឆ្លងកាត់ផ្លូវមួយដ៏វែងឆ្ងាយ ចាប់តាំងពីវាបានចេញជារូបរាងដំបូង នៅដើមទសវត្សរ៍ឆ្នាំ ១៩៩០ មក។ ការកើនឡើងនៃចំនួនប្រជាជនកម្ពុជា ដែលទទួលស្គាល់ថាការតស៊ូមតិ អាចជំរុញឲ្យអ្នកធ្វើគោលនយោបាយ ដាក់ចេញនូវការផ្លាស់ប្តូរ ដោយធ្វើឲ្យជីវិតប្រជានជនម្នាក់ៗ និងសហគមន៍ទាំងអស់ មានភាពប្រសើរឡើង។ ដោយមានប្រជាជនកម្ពុជាកាន់តែច្រើន យល់ដឹងអំពីអំណាចនៃការតស៊ូមតិនោះ ការទាមទារក៏កើនឡើងផងដែរ សម្រាប់ការផ្ដួចផ្ដើមការអភិវឌ្ឍសមត្ថភាព ដែលគាំទ្រដល់ក្រុមតស៊ូមតិក្នុងសហគមន៍ ក្នុងបញ្ហាជាច្រើនដូចជា ជម្លោះដីធ្លី អំពើពុករលួយ ការអនុវត្តច្បាប់ ការគ្រប់គ្រងធនធានធម្មជាតិ សេរីភាពនៃការបញ្ចេញមតិ លក្ខខណ្ឌការងារ និងការការពារសិទ្ធិមនុស្ស។ ទោះបីជាយ៉ាងណាក៏ដោយ ក៏នៅមានបញ្ហាផ្សេងៗទៀតដែលត្រូវតែធ្វើ សម្រាប់សង្គមស៊ីវិលកម្ពុជា និងអង្គការសហគមន៍ ដើម្បីឲ្យមានការលើកឡើងនូវសំឡេងរបស់ខ្លួនប្រកបដោយប្រសិទ្ធភាព ហើយផ្សព្វផ្សាយតម្រូវការ និងការទាមទាមរបស់ពួកគេ។

វិទ្យាស្ថានតស៊ូមតិ និងគោលនយោបាយ (API) ធ្វើការឆ្ពោះទៅរកការកសាងសមត្ថភាពសម្រាប់អ្នកតស៊ូមតិកម្ពុជា ដែលទាក់ទងនឹងជំនាញនៃការតស៊ូមតិ និងការអភិវឌ្ឍគោលយោបាយ។ ដូចនេះ API ស្វែករកការពង្រឹងសមត្ថភាពរបស់អ្នកតស៊ូមតិកម្ពុជា​ ក្នុងការជះឥទ្ធិពលទៅលើគោលនយោបាយ ពីគ្រប់វិស័យ និងថ្នាក់សហគមន៍ថែមទៀត។ គោលបំណងរបស់ API គឺចង់ជួយអ្នកតស៊ូមតិកម្ពុជា ឲ្យទទួលបាននូវចំណេះដឹង និងជំនាញថ្មី ក្នុងការរចនា គ្រប់គ្រង អនុវត្ត និងវាយតម្លៃលើយុទ្ធនាការ និងការផ្ដួចផ្ដើមនៃការបញ្ចុះបញ្ចូលឲ្យមានការកែប្រែច្បាប់ និងការតស៊ូមតិ ក៏ដូចជាការពង្រឹងទំនាក់ទំនងជាមួយស្ថាប័នរដ្ឋាភិបាល ដែលប្ដេជ្ញាធ្វើឲ្យអ្នកបង្កើតច្បាប់ធ្វើការកែប្រែ និងការលើកឡើងមកនិយាយដោះស្រាយ ពីបញ្ហាសហគមន៍។