កញ្ញា សូ សោភា តំណាងអង្គការវិទ្យាស្ថានតស៊ូមតិ និងគោលនយោបាយ (API) បានបញ្ជាក់ថា សកម្មភាពដែលអង្គការកំពុងអនុវត្តក្នុងឆ្នាំ២០២៥នេះ មាននៅក្នុង២គម្រោង ៣ម្ចាស់ជំនួយ។ គម្រោងទី១ សំឡេង និង សកម្មភាពរបស់ប្រជាពលរដ្ឋសម្រាប់ការអភិវឌ្ឍប្រកបដោយនិរន្តរភាពនៅកម្ពុជា ដំណាក់កាលទី២ ផ្តល់មូលនិធិពីអង្គការ Bread for the World (BfdW) ជំនួយព្រះវិហារដាណឺម៉ាក (DCA) និងគម្រោង «ពង្រឹងការចូលរួមរបស់ ពលរដ្ឋក្នុង ការគ្រប់គ្រងហិរញ្ញវត្ថុសាធារណៈ ផ្តល់មូលនិធិពី អុកស្វាម និងសហភាពអឺរ៉ុប (EU)»។

កញ្ញាបន្តថា វេទិកាសាធារណៈនេះមានគោលបំណងពង្រឹងការចូលរួមរបស់ប្រជាពលរដ្ឋ ជាពិសេសស្ត្រី យុវជន ជនជាតិដើមភាគតិច និងជនមានពិការភាព នៅក្នុងការពង្រឹងការគ្រប់គ្រងហិរញ្ញវត្ថុ សាធារណៈ និងអភិបាលកិច្ចមូលដ្ឋាន ដើម្បីលើកកម្ពស់តម្លាភាព ការទទួលបានព័ត៌មានស្តីពី សេវាការិយាល័យច្រកចេញចូលតែមួយ ព័ត៌មានថវិកាប្រចាំឆ្នាំ និងលទ្ធកម្មគម្រោងមូលនិធិស្រុក ជូនប្រជាពលរដ្ឋក្នុងសហគមន៍។

ការលើកឡើងពីប្រជាពលរដ្ឋសំណូមពរឲ្យអាជ្ញាធរ ឃុំ ស្រុក ជួយពន្លឿនការបម្រើសេវាឲ្យបានឆាប់រហ័សលើបញ្ហាមួយចំនួនដូចជា ការកែតម្រូវលើសំបុត្រកំណើត ឬសំបុត្របញ្ជាក់កណើត (ខុសភេទ ខុសអាយុ ថ្ងៃខែឆ្នាំកំណើត ទីកន្លែងកំណើត ក៏ដូចជាឈ្មោះ ខុសអក្ខរាវិរុទ្ធ) សុំឱ្យមានការកែតម្រូវ នៅត្រឹមថ្នាក់ស្រុកដែលអាចកែបាន និងសំណូមពរផ្តល់ថវិការបស់ស្រុកជួយដល់សហគមន៍ព្រៃឈើនិងសហគមន៍នេសាទផង ជួយជួសជុលផ្លូវទៅភូមិគគីរ ឃុំសាលាវិស័យ។

លោក ឈួន រ៉ា បានកោតសរសើរ និងវាយតម្លៃខ្ពស់ចំពោះអង្គការវិទ្យាស្ថានតស៊ូមតិ និងគោលយោបាយ (API) ដែលបានខិតខំប្រឹងប្រែងផ្តល់យោបល់ បទពិសោធន៍ ដើម្បីដោះស្រាយពីកង្វល់ និងបញ្ហាក្នុងសហគមន៍ និងស្វែងរកដំណោះស្រាយជូនប្រជាពលរដ្ឋ។

លោកបន្តថា អ្នកចូលរួមទាំងអស់បានលើកឡើងនូវទុក្ខកង្វល់ បញ្ហាប្រឈម និងសំណូមពរនានាឱ្យបានច្រើនពីព្រោះប្រជាពលរដ្ឋគ្រប់រូបមានសិទ្ធិស្មើៗគ្នាក្នុងការបញ្ចេញមតិយោបល់ដើម្បី មកធ្វើការពិភាក្សា ស្រាយបំភ្លឺឱ្យបានច្បាស់លាស់ ប្រកបដោយតម្លាភាព និងឈានទៅរកការដោះស្រាយជូនបានចំគោលដៅ មានប្រសិទ្ធិភាព និងទាន់ពេលវេលា។

លោកសំណូមពរដល់អាជ្ញាធរភូមិឃុំ និងសហគមន៍ ឲ្យបន្តសហការជាមួយគ្នាបន្ថែមទៀត ដើម្បីចូលរួមការពារផលប្រយោជគរបស់សហគមន៍ ដែលមានស្រាប់នៅក្នុងមូលដ្ឋានរបស់ខ្លួន ព្រមទាំងបានធ្វើការគាំទ្រ និងចូលរួមសហការជាមួយសហគមន៍ទាំងអស់នៅក្នុងមូលដ្ឋានរបស់ខ្លួន ក្នុងការអនុវត្តរាល់ការលំបាក និងបញ្ហាប្រឈមនានាដែលកើតមានឡើងក្នុងការរួមគ្នាដោះស្រាយ និងជំរុញឱ្យអាជ្ញាធរឃុំ សហគមន៍ ផ្សព្វផ្សាយពីសេវាច្រកចេញចូលតែមួយដល់បងប្អូនប្រជាពលរដ្ឋនៅដល់មូលដ្ឋានដើម្បីទទួលបាននូវសេវាមួយល្អ ស្របច្បាប់ចៀសវាងការចាញ់បោកពីជនបោកប្រាស់។

លោក ឈួន រ៉ា បានបញ្ជាក់ថា រដ្ឋបាលស្រុកប្រាសាទបល្ល័ង្ក មានផែនការថវិកាប្រចាំឆ្នាំ២០២៥ មានចំនួន ៦៥៧.០៨៦.៨៥$ ដោយបានចំណាយលើថវិកាអភិវឌ្ឍន៍ ថវិការដ្ឋបាលនិងថវិកាចំណាយមិនបានគ្រោងទុក៕