វគ្គបណ្តុះបណ្តាល

វគ្គបណ្តុះបណ្តាលនេះ ពង្រឹងសមត្ថភាពអ្នកចូលរួម ដើម្បីជួយសម្រួលដល់ការប្រជុំក្រុមប្រឹក្សា និងសិក្ខាសាលា។ សំណួរដែលយើងនឹងត្រូវលើកឡើងមកដោះស្រាយរួមមាន៖ តើអ្វីជាការសម្រប​សម្រួល? តើអ្វីជាការប្រជុំ ការបណ្តុះបណ្តាល និងការរចនាសិក្ខាសាលា? តើអ្វីខ្លះដែលត្រូវយកមកពិចារណា នៅពេលរៀបចំព្រឹត្តិការណ៍ទាំងនេះ? តើធ្វើដូចម្តេច ដើម្បីរៀបចំកម្មវិធី​ទាំងនោះឲ្យមានប្រសិទ្ធភាព ដើម្បីសម្រេចបាននូវគោលដៅដែលរំពឹងទុក? តើមាន​វិធីសាស្ត្រ​គន្លឹះអ្វីខ្លះ ដែលអាចប្រើបាន? តើអ្នកសម្របសម្រួល គួរមានបុគ្គលិកលក្ខណៈ និងជំនាញអ្វីខ្លះ? តើធ្វើដូចម្តេចដើម្បីទទួលបានជំនាញទាំងនោះ? តើអ្វីដែលត្រូវធ្វើក្នុងស្ថានភាពលំបាក ឧទាហរណ៍ នៅពេលដោះស្រាយជាមួយអ្នកចូលរួម ដែលលែងយកចិត្តទុកដាក់ ឬក៏បង្កើតបញ្ហា ដែលមិនបាន​រំពឹងទុក? ការបណ្តុះបណ្តាលនេះ ប្រើវិធីសាស្ត្រចម្រុះ លំហាត់ផ្សេងៗគ្នា លើការរចនា និងសម្រប​សម្រួលការប្រជុំ ការបណ្ដុះបណ្ដាល និងសិក្ខាសាលា ក៏ដូចជាការស្នើសុំមតិយោបល់ពី​អ្នក​ចូលរួម​ទៀតផង។

ដោយមានភាពស្រដៀងគ្នា ក្នុងការលើកឡើងទៅកាន់សមាជិកក្រុមប្រឹក្សាមូលដ្ឋានផងដែរ​នោះ វគ្គសិក្សានេះមានគោលបំណងបង្រៀនពួកគេ ពីរបៀបប្រាស្រ័យទាក់ទងប្រកបដោយប្រសិទ្ធភាព ដើម្បីបំពេញតួនាទីរបស់ពួកគេឲ្យកាន់តែប្រសើរឡើង និងបំពេញគោលបំណងរបស់ខ្លួន។ ប្រធានបទដែលយើងនឹងលើកយកមកនិយាយរួមមាន៖ តើការប្រាស្រ័យទាក់ទងគឺជាអ្វី? ហេតុអ្វីយើងត្រូវមានជំនាញទំនាក់ទំនងល្អ? រចនាសម្ព័ន្ធនៃដំណើរការទំនាក់ទំនង, ជំនាញដែលត្រូវការដើម្បីប្រាស្រ័យទាក់ទងប្រកបដោយប្រសិទ្ធភាព ជាមួយអ្នកពាក់ព័ន្ធផ្សេងៗគ្នា (ឧទាហរណ៍៖ ការ​ស្តាប់យ៉ាងសកម្ម ការសង្ខេប ការសង្កេតយ៉ាងសកម្ម សំណួរដែលមានប្រសិទ្ធភាព ការប្រាស្រ័យទាក់ទងដោយផ្ទាល់មាត់ និងមិនផ្ទាល់មាត់ ការបង្កើតទំនុកចិត្ត), តើធ្វើដូចម្តេចដើម្បីជៀសវាងកំហុស និងទម្លាប់មិនត្រឹមត្រូវក្នុងការទំនាក់ទំនង? តើធ្វើដូចម្តេចដើម្បីដឹងថាតើឧបករណ៍សម្ភារៈណា ដែលល្អបំផុតសម្រាប់កិច្ចប្រឹងប្រែងប្រាស្រ័យទាក់ទងផ្ទាល់ខ្លួន ហើយត្រូវនឹងបុគ្គលិក​លក្ខណៈ​ខ្លួនផងនោះ? តើឧបសគ្គអ្វីខ្លះ ដែលអាចកើតមានក្នុងការប្រាស្រ័យទាក់ទង និងវិធីដើម្បីយកឈ្នះវា?

មន្ត្រីមូលដ្ឋានក៏ត្រូវមានលទ្ធភាពរៀបចំសំណើគម្រោង និងផែនការថវិកាផងដែរ ជាពិសេស បន្ទាប់ពីកំណែទម្រង់វិមជ្ឈការនាពេលថ្មីៗនេះ។ នេះមិនមែនជាកិច្ចការងាយស្រួលនោះទេ ដូច្នេះហើយ​ ក្នុងវគ្គសិក្សានេះ​ យើងនឹងដោះស្រាយជាមួយប្រធានបទដូចជា៖ តើការសរសេរ​សំណើគឺជាអ្វី? តើអ្វីជាជំហានសំខាន់ៗ នៃការសរសេរសំណើដោយជោគជ័យ? តើធ្វើដូច​ម្ដេច ដើម្បីបង្កើតគំនិតគម្រោង ឧទាហរណ៍ ដូចជាការប្ដេជ្ញាក្នុងការចាប់ផ្ដើមធ្វើការវិភាគមែកធាង​នៃបញ្ហា? តើធ្វើដូចម្តេចដើម្បីជ្រើសរើសគោលដៅ គោលបំណង លទ្ធផល សូចនាករ និងឥទ្ធិពលផ្ទាល់ ដែលចង់បាននៅក្នុងការអនុវត្តគម្រោងពិតប្រាកដ? តើធ្វើដូចម្តេច ដើម្បីរៀបចំក្របខ័ណ្ឌដែលសមស្របសម្រាប់គម្រោងទូទៅ ដោយប្រើទម្រង់សាមញ្ញ? តើធ្វើដូចម្តេច ដើម្បីរៀបចំផែនការថវិកា? តើធ្វើដូចម្តេច ដើម្បីវាយតម្លៃសំណើគម្រោងផ្ទាល់ខ្លួនរបស់អ្នក ដោយយោងទៅតាមតារាងត្រួតពិនិត្យ? វគ្គបណ្តុះបណ្តាលនេះ ប្រើលំហាត់ជាក់ស្តែងផ្សេងៗគ្នា ដោយសង្កត់ធ្ងន់លើជំហាននៃការស្នើសុំ និងការអភិវឌ្ឍថវិកា។ អ្នកចូលរួមនឹងត្រូវបានស្នើសុំឲ្យសរសេរសំណើខ្លីៗ ហើយនឹងទទួលបានការឆ្លើយតប និងដំបូន្មានពីគ្រូបណ្ដុះបណ្ដាល ទាក់ទងនឹងសំណើ ដែលពួកគេបានសរសេរ។