ដើម្បីចូលរួមអបអរសាទរ ទិវាបរិស្ថានជាតិ និងទិវាបរិស្ថានពិភពលោក ឆ្នាំ២០២៦ ក្រោមប្រធានបទថ្នាក់ជាតិ «សំណល់សូន្យ» គ្រឹះស្ថានសិក្សាក្នុងតំបន់គោលដៅនៃគម្រោង A-SASSY នៅរាជធានីភ្នំពេញ ខេត្តបាត់ដំបង ខេត្តត្បូងឃ្មុំ និងខេត្តកំពង់ចាម បានរៀបចំសកម្មភាពបរិស្ថានយ៉ាងសកម្ម។

ក្នុងនោះ មានវិទ្យាល័យ អនុវិទ្យាល័យ និងសាកលវិទ្យាល័យបានធ្វើសកម្មភាពបរិស្ថាន ដែលមានអ្នកចូលរួមសរុប ១,២៧៦ នាក់ ក្នុងនោះ ស្រី ៧៦៤​ នាក់។ សកម្មភាពដែលបានអនុវត្តរួមមាន ការចែករំលែកចំណេះដឹងអំពីបរិស្ថានដោយយុវជន AGGA ដល់សិស្សានុសិស្ស ការរើសសំរាម និងសម្អាតទីធ្លាសាលា និងតាមសហគមន៍ ព្រមទាំងការដាំកូនឈើចំនួន ១០០ ដើម។

សកម្មភាពទាំងនេះបានបង្ហាញពីតួនាទីដ៏សំខាន់របស់យុវជន និងគ្រឹះស្ថានសិក្សា ក្នុងការចូលរួមថែរក្សាបរិស្ថាន និងលើកកម្ពស់ការរស់នៅបែបបៃតង ស្អាត និងចីរភាព។

វិទ្យាស្ថាន API តាមរយៈគម្រោង A-SASSY សូមថ្លែងអំណរគុណដល់គ្រឹះស្ថានសិក្សា លោកគ្រូ អ្នកគ្រូ យុវជន សិស្សានុសិស្ស និងដៃគូពាក់ព័ន្ធទាំងអស់ ដែលបានចូលរួមគាំទ្រ និងរួមចំណែកធ្វើឱ្យសកម្មភាពនេះទទួលបានជោគជ័យ។

រួមគ្នាចាប់ផ្តើមពីសកម្មភាពតូចៗ ដើម្បីកសាងអនាគតដែលស្អាត បៃតង និងប្រសើរជាងមុនសម្រាប់មនុស្សជំនាន់ក្រោយ។